Ноќта пред Крстовден замислете една желба – по старото верување, може да ви се оствари!
Во предвечерјето на големиот празник Крстовден, народните преданија велат дека има посебна моќ во полноќ. Иако многумина ова верување го поврзуваат со Богојавление, стари записи откриваат дека и ноќта пред есенскиот Крстовден носи посебна магија.
Во предвечерјето на големиот христијански празник Крстовден (27 септември), кој е посветен на пронаоѓањето на Чесниот Крст, народот со векови пренесува различни обичаи и верувања. Покрај строгиот пост и осветувањето на босилекот, едно од најинтересните преданија вели дека точно во полноќ треба да погледнете во небото!
Според старото народно верување, оној кој ќе биде буден во полноќ, ќе излезе надвор или ќе погледне низ прозорецот кон небото и искрено ќе замисли една единствена желба, може да очекува нејзино остварување.
Една јасна желба и искрена мисла
Во народните записи се нагласува дека не треба да се посакуваат десет работи одеднаш. Потребно е да застанете за момент, да се фокусирате на она што ви е најважно во животот и јасно да ја формулирате желбата.
Иако црковното учење не пропишува исполнување на желби во полноќ и го става акцентот на пост, молитва и духовно прочистување, ова верување останува омилен романтичен обичај во народната традиција.
Покрај ова верување, на самиот ден Крстовден (27 септември) се почитуваат и следниве обичаи:
Строг пост, потоа берење и осветување босилек – кој потоа се чува во домот за заштита, како и средување на домот – се верува дека куќата треба да се исчисти и подготви за претстојната зима.
Ако вечерва одлучите да погледнете кон небото точно во полноќ, посакајте го она што најмногу го сакате со искрено срце!
Како правилно се пости за Крстовден?
Постот на Крстовден има две димензии, духовна и телесна.
Духовниот пост е поважен и подразбира воздржување од лоши мисли и дела, негување на љубов, мир, слога и трпение.
Многумина мислат дека телесниот пост на овој ден се состои само во избегнување храна од животинско потекло и масло, но тука „грешат“ дури и верниците.
На Крстовден постот е строг, дозволени се исклучиво сирови намирници од растително потекло или само леб и вода, и тоа еднаш дневно – во деветиот час (околу 15 часот попладне).
На овој начин, преку постот се смируваат страстите – сластољубие и стомакоугодие.
Што треба да се јаде на овој ден?
На Крстовден се практикува строг пост (без масло) а кај народот со православна вероисповед се верува дека посебна улога имаат осветениот босилек и грозјето. Меѓутоа, кога Крстовден се паѓа во сабота или недела, доаѓа до ублажување на постот, односно се разрешува употреба на масло (зејтин) и вино, така што дозволено е да се подготвува храна на масло и да се пие вино, но храната и понатаму треба да биде посна (без месо, млечни производи и јајца).
