Силни земјотреси утрово ги погодија Родос, Аргентина и Костарика. Најсилниот беше 5,8 степени според Рихтеровата скала.
Земјотрес со јачина од 4,7 степени според Рихтеровата скала утрово го погоди подрачјето во близина на грчкиот остров Родос, објави Европско-медитеранскиот сеизмолошки центар (EMSC). Според извештаите, епицентарот на земјотресот бил на отворено море, на длабочина од 30 километри, североисточно од градот Родос.
Според исказите на очевидци објавени на веб-страницата на EMSC, земјотресот бил почувствуван и во блиските турски крајбрежни градови, а многу луѓе биле разбудени од сон од силниот потрес. Не е издадено предупредување за цунами.
Силен земјотрес со јачина од 5,7 степени според Рихтеровата скала денес ја погоди и Аргентина, објави Европско-медитеранскиот сеизмолошки центар. Епицентарот на земјотресот бил на 188 километри од градот Сан Луис, на длабочина од 122 километри, во регионот Ла Риоха.
Земјотрес со јачина од 5,8 степени според Рихтеровата скала ја погоди Костарика денес. Според извештаите, епицентарот на земјотресот бил на 43 километри од главниот град на Костарика, Сан Хозе, на длабочина од 31 километар. Потресот бил силен и траел долго време. Како што велат, предметите паѓале од полиците, а кучињата и мачките биле видливо вознемирени.
Засега нема извештаи за повредени или материјална штета од земјотресите во светот.
