Цените на нафтата денеска се стабилизираа на меѓународните пазари на над 97 долари по шокот утринава што предизвика загриженост за снабдувањето по признавањето од страна на Русија на двата отцепени региони во источна Украина.
Цената на барел нафта на лондонскиот пазар во попладневната трговија пораснала за 1,93 долари во однос на претходното затворање и изнесува 97,32 долари. Утрово накратко скокна на највисокото ниво од септември 2014 година, на 99,50 долари.
На американскиот пазар со барел се тргуваше за 2,96 долари повисоко, по 94,03 долари. На почетокот на трговијата, накратко го допре седумгодишниот максимум од 96 долари.
Трговците внимателно ја следат ескалацијата на кризата во Украина. По честите судири на линијата што ги дели украинските вооружени сили и проруските бунтовници, Москва синоќа ги призна одметнатите региони Доњецк и Луганск и испрати војници со „мировна“ мисија во областа.
Западот сега размислува за нови санкции против Москва, што ги отфрла тврдењата дека подготвува инвазија на соседната земја. Германија ја суспендираше сертификацијата на гасоводот Северен тек 2, што требаше да испорачува руски гас.
Руската нафта засега не се споменува во вестите за санкциите.
„Нафтениот пазар го очекува период на превирања и нервоза, зачинет со геополитички тензии и емоции“, вели Норберт Рикер од швајцарската банка Јулиус Баер. „Со оглед на преовладувачкото расположение, цената на нафтата лесно може да се искачи на трицифрено ниво на краток рок“, додаде Рукер.
Украинската криза им даде дополнителна поддршка на цените на нафтата, градејќи се на тесните залихи во период на силно закрепнување на побарувачката паралелно со закрепнувањето на економиите од пандемиската криза.
Организацијата на земјите извознички на нафта (ОПЕК) и нејзините сојузници меѓу независните производители ги одбиваат повиците за зголемување на испораките значително повеќе од планираните 400.000 барели дневно во наредните месеци.
Нигерискиот министер за нафта денеска ја повтори позицијата на ОПЕК + дека испораките не треба значително да се зголемуваат, укажувајќи на можно враќање на иранскиот пазар на барели доколку Иран и САД постигнат договор за заживување на нуклеарниот договор од 2015 година.
Успешните преговори на крајот би можеле да го зголемат извозот на нафта на Иран за повеќе од еден милион барели дневно.
ОПЕК изутринава одделно објави дека цената на барел кошница нафта од нејзините членки вчера изнесувала 94,28 долари, што значи дека е зголемена за 1,49 долари во однос на претходниот работен ден, објави Ројтерс.
