Започнуваат подготовките за Бадниковите поворки 2026. Оваа година, обединети под мотото „Пренеси ја Божикната радост до секое срце“ организаторите го најавуваат најсветлото празнично доживување, кое преку ангелското пеење на децата, ќе ги стоплат срцата на сите.
На бадниковата поворка што по традиција ќе се одржи на Бадник, 6 јануари, ден пред големиот христијански празник Божиќ, оваа година во Охрид ќе учествуваат голем број на деца од Охрид. Со ѕвезди во рацете тие ќе ја пеат возобновената христијанска песна ,,Вечниот Бог”.
Поворката тргнува утрото во 10:30 ч. од црквата ,,Св. великомаченик Георгиј” – Горна Влашка Мала и ќе се движи по ул. „Јане Сандански“, булевар „Туристичка“ и охридската чаршија.
Во 12.00 ч. на градскиот плоштад „Св. Климент Охридски“ кај бадниковата пештера коледарчињата ќе ги пречека градоначалникот Кирил Пецаков, заедно со советниците од Советот на Општина Охрид и директорите на охридските јавни претпријатија кои ќе ги даруваат со пригодни подароци.
