Нама да се оди на училиште во сабота. Деновите кои Владата ги прогласи за неработни поради престојните избори, учениците ќе ги одработуваат во текот на работните седмици до крајот на оваа учебна година, со тоа што подолго од вообичаеното ќе останат во училишните клупи. Вака реши МОН по бурните реакции на родителите, но и просветните работници.
Министерството за образование и наука информира дека наставата од деновите на гласање, 24 април и 8 мај, како и од 30 ноември кога беше организиран Самитот на ОБСЕ во Скопје, наместо во саботи, ќе се надомести во работни денови. Дополнувањето на нереализираните наставни часови ќе го планираат и организираат директорите на училиштата и ќе се реализира со подолг престој на учениците во денови од работната недела, во рамки на шестчасовното работно време на наставниците, соопштија од ресорното министерство.
