Според најновите податоци на Евростат за 2023 година, анализирани од „Еуроњуз“, Македонија се наоѓа на третото место во Европа по стапката на фемицид. Земјата бележи шест убиени жени на милион жители, што ја става веднаш зад Латвија со 17 и Литванија со 10 жртви на милион жители.
Овие бројки значително го надминуваат европскиот просек од 4,1 убиена жена на милион жители, што укажува дека родово базираното насилство продолжува да биде сериозен безбедносен и социјален проблем, особено во Источна и Југоисточна Европа.
Дополнително, статистиката покажува дека жените во Европа се изложени на двојно поголем ризик да бидат убиени од блиски членови на семејството или интимни партнери во споредба со мажите, што ја потенцира врската меѓу фемицидот и семејното насилство.
Најниски стапки на вакви убиства се регистрирани во Грција (1,8), Шпанија (2) и Холандија (2,3 жени на милион жители). Податоците ја нагласуваат потребата од поефикасни мерки за превенција, заштита на жртвите и системска борба против родово базираното насилство.
