Високите кирии, растечките трошоци за здравствено осигурување и стагнацијата на платите сè повеќе го притискаат животниот стандард во Швајцарија. Како резултат на тоа, многу граѓани штедат помалку, а дел од нив едвај ги покриваат основните животни трошоци.
Според анкета на швајцарскиот весник „Блик“, спроведена меѓу повеќе од 7.000 читатели, речиси една третина од испитаниците располагаат со помалку од 500 швајцарски франци месечно по подмирување на фиксните трошоци. Дополнително, 13 проценти немаат никаков преостанат износ, додека нешто повеќе од една четвртина успеваат да заштедат над 3.000 франци месечно.
Поради зголемениот финансиски притисок, сè повеќе граѓани бараат алтернатива надвор од земјата. Дел од пензионерите се одлучуваат да се преселат во Шпанија, бидејќи пензија од околу 1.900 франци повеќе не им овозможува пристоен живот во Швајцарија.
Најпогодени од растот на цените на домувањето и здравственото осигурување се домаќинствата со ниски и средни приходи. Во меѓувреме, сè погласни се повиците за итни мерки со цел да се спречи натамошно влошување на социјалната состојба, пренесува Б92.
