По повод 35 години од државноста на Република Македонија, Општина Охрид за првпат организира Меѓународна ликовна колонија „Лихнид–Охрид“, која ќе се одржи во периодот од 1 до 8 септември 2026 година.
На колонијата ќе учествуваат врвни ликовни уметници од земјата и странство, а целта е оваа културна иницијатива да прерасне во традиционална манифестација што ќе го збогатува културниот живот на Охрид и ќе ја промовира современата ликовна уметност.
Свеченото затворање на колонијата ќе се одржи на 7 септември 2026 година, во пресрет на големиот државен празник 8 Септември – Денот на независноста на Република Македонија. На градскиот плоштад ќе биде поставена изложба на делата создадени за време на колонијата, овозможувајќи им на граѓаните и посетителите да се запознаат со творештвото на учесниците, информираат од Општина Охрид.
Називот „Лихнид–Охрид“ симболично ги поврзува античкото и современото име на градот, истакнувајќи го неговиот историски и културен континуитет. Во логото на колонијата е вклучен грбот на Општина Охрид како симбол на организаторот, додека типографијата, инспирирана од охридските бранови, ги обединува препознатливите симболи на градот со елементите на ликовната уметност. Автор на логото е академската сликарка м-р Славица Танеска.
