Заврши асфалтирањето на патот што води до црквата „Свети Наум“ во селото Орман, информира градоначалникот на Охрид, Кирил Пецаков.
Според него, со реализацијата на овој проект конечно е решен долгогодишен проблем за жителите на селото, како и за верниците и посетителите кои ја посетуваат црквата.
„По долгогодишно очекување, жителите на Орман, како и сите верници и посетители на црквата, добиваат уреден и лесно пристапен пат“, истакна Пецаков.
Проектот е финансиран со средства од Буџетот на Општина Охрид, во рамки на Програмата за уредување на градежно земјиште.
Од локалната самоуправа најавуваат дека и во наредниот период ќе продолжи реализацијата на инфраструктурни проекти насочени кон подобрување на условите за живот и обезбедување рамномерен развој на сите населени места во општината.
