Мавровското Езеро од денеска па сè до 7 септември ќе биде под посебен режим поради одржувањето на Светското првенство во риболов.
Според известувањето на Јавното претпријатие Национален парк „Маврово“, во периодот од 26 август до 7 септември 2026 година се забрануваат спортскиот, рекреативниот и сите други видови риболов, како и употребата на пловни средства на езерото.
Мерката е донесена за да се обезбеди заштита на рибниот фонд, вклучително и рибите кои се пуштени во езерото специјално за потребите на натпреварувањето, кое се одржува под покровителство на FIPSed и претставува еден од најзначајните меѓународни спортско-риболовни настани.
Во текот на забраната нема да биде дозволена ниту пловидба со чамци и други пловни средства. Исклучок ќе има само за пловилата на полицијата, спасувачките служби и надлежните институции кога нивното ангажирање е неопходно за безбедноста и организацијата на првенството.
Од Националниот парк „Маврово“ апелираат до риболовците, туристите и сите посетители да ги почитуваат ограничувањата и да се воздржат од активности кои се спротивни на воведените мерки.
Забраната останува во сила до завршувањето на Светското првенство, односно до 7 септември.
