HomeАктуелноКрвав напад во Краков: Шестмина загинати, 16 повредени – Полска во национална жалост

Крвав напад во Краков: Шестмина загинати, 16 повредени – Полска во национална жалост

Полска е во национална жалост по крвавиот вооружен напад што во саботата го потресе Краков, во кој шест лица беа убиени, а 16 повредени.

-50%
За Твојата Реклама на овој рекламен банер

Нападот се случил на главниот плоштад во историскиот центар на Краков, едно од најпосетуваните туристички места во градот. Според досегашните информации, 24-годишен полски државјанин со возило пристигнал на плоштадот и почнал да пука кон луѓето.

Полицијата интервенирала и во престрелката напаѓачот бил ранет и совладан. Меѓу повредените се и двајца полициски службеници, а осомничениот исто така е хоспитализиран и се наоѓа во тешка состојба.

Истрагата го третира случајот како терористички чин

Полското обвинителство отвори истрага за убиство и обид за убиство на повеќе лица, вклучително и полициски службеници, при што нападот е правно квалификуван како терористички акт.

Истрагата дополнително се проширува и на друг трагичен настан. Во семејниот дом на осомничениот во градот Островец Свјентокшиски биле пронајдени телата на неговите родители и неговата сестра. Според досегашните сознанија, постои основано сомнение дека и овие три лица биле убиени од истиот сторител.

Осомничениот, според полските власти, имал оружна дозвола, а во истрагата се проверува и неговата можна поврзаност со радикални и крајнодесничарски идеологии. Сепак, истрагата сè уште трае и се утврдуваат сите околности и мотивите за нападот.

Полска во национална жалост

Во Полска се прогласени два дена национална жалост, 8 и 9 ноември, во знак на почит кон жртвите.

На местото на нападот граѓани оставаат цвеќе и палат свеќи, додека Краков се обидува да се справи со последиците од нападот што го потресе градот и целата земја.

Rate This Article:
No comments

Sorry, the comment form is closed at this time.