HomeАктуелноОд денес новини во банкарските плаќања – се воведува IBAN формат, се менуваат уплатниците и шифрите

Од денес новини во банкарските плаќања – се воведува IBAN формат, се менуваат уплатниците и шифрите

Од денес, 9 ноември, во Република Северна Македонија започнува примената на нови правила во домашниот платен промет. Промените се однесуваат на денарските платежни сметки, платните налози и шифрите за целта на плаќањето, а произлегуваат од усогласувањето со меѓународниот стандард ISO 20022.

-50%
За Твојата Реклама на овој рекламен банер

Една од најважните новини е воведувањето на IBAN форматот за денарските платежни сметки. Пред досегашниот број на сметката ќе се додава ознаката MK07.

Тоа значи дека граѓаните нема да треба да отвораат нови платежни сметки, ниту да ги менуваат постојните броеви. Банките ќе ги направат потребните технички приспособувања за користење на новиот формат.

Се менуваат и досегашните уплатници

Од денес досегашните платни налози ПП10, ПП30, ПП40, ПП50 и ПП53 се заменуваат со нови стандардизирани обрасци.

Новите налози ќе имаат изменет изглед, распоред и содржина на полињата. Ова особено се однесува на граѓаните кои плаќањата ги вршат на шалтерите во банките.

Кај електронското и мобилното банкарство, начинот на внесување на налозите во голем дел останува ист, но можно е приказот на одредени податоци да биде изменет, зависно од банката.

Нови шифри за целта на плаќањето

Се менуваат и досегашните нумерички шифри за целта на плаќањето. Тие се заменуваат со нови алфанумерички ознаки од четири знаци, согласно стандардот ISO 20022.

Граѓаните и фирмите треба да ги следат упатствата на својата банка при пополнување на платните налози, особено доколку користат претходно подготвени или автоматизирани налози.

Што треба да направат граѓаните?

За повеќето корисници на мобилно и електронско банкарство не се очекува значителна промена во секојдневното користење на услугите. Сепак, кај хартиените налози ќе треба да се користат новите обрасци, а при плаќањата да се следат новите ознаки и упатствата на банките.

Промените се дел од модернизацијата и стандардизацијата на домашниот платен систем, со цел поусогласено и поефикасно извршување на платежните трансакции.

Rate This Article:
No comments

Sorry, the comment form is closed at this time.