Телата на шест заложници беа извлечени од Појасот Газа, соопшти израелската војска рано утринава, пренесе ДПА.
Шестте тела беа пронајдени во подземен тунел во областа Рафа на југот на Појасот Газа и пренесени во Израел, соопшти израелските одбранбени сили (ИДФ) на Телеграм, додаде германската агенција.
Сите шест лица биле киднапирани за време на терористичкиот напад врз јужен Израел, на 7 октомври 2023 година, што го предводеше Хамас, соопшти ИДФ.
Според портпаролот на армијата, заложниците биле убиени од киднаперите непосредно пред да бидат пронајдени нивните тела.
Меѓу жртвите е и американско-израелскиот заложник Херш Голдберг-Полин, се наведува во соопштението на американскиот претседател Џо Бајден.
Израелското Министерство за надворешни работи објави соопштение од роднините на Голдберг-Полин, во кое тие ја објавија смртта на нивниот „сакан син и брат“, наведе ДПА.
