По повеќе од половина век од последните мисии на Месечината, човештвото повторно испишува историја. Американската вселенска агенција NASA ја реализира мисијата Artemis II, која веќе е во тек и претставува прво патување на луѓе кон Месечината по ерата на Аполо.
Четворица астронаути се наоѓаат во вселенското летало „Орион“, кое патува кон Месечината на 10-дневна мисија. Ова е најдалечното патување на луѓе во вселената досега, со планирана траекторија која ќе ги однесе илјадници километри зад Месечината пред да се вратат на Земјата.
Мисијата нема да слета на Месечината, туку има за цел да ги тестира системите за идните мисии, кога повторно ќе се испратат луѓе на нејзината површина и ќе се гради постојана база.
Во текот на летот, астронаутите веќе испратија спектакуларни фотографии од Земјата, која од далечина изгледа како светлечка топка во темнината на вселената.
Иако мисијата засега се одвива успешно, имало и драматични моменти. Екипажот пријавил аларм за можно протекување во кабината веднаш по полетувањето, но по проверките било утврдено дека станува збор за лажен сигнал.
Интересно е што храната на астронаутите е далеку поразновидна од порано – на менито има дури и макарони со сирење, месо, салати и десерти, специјално прилагодени за услови во вселената.
Мисијата „Артемис II“ е само еден чекор во поголемиот план на NASA – до крајот на деценијата повторно да се испратат луѓе на Месечината и да се постават темелите за идни мисии кон Марс.
Ова патување не е само научен подвиг, туку и симбол на новата вселенска трка и амбицијата човештвото повторно да го освои вселенскиот простор.
