Денеска Регулаторната комисија за енергетика треба да ги соопшти новите цени на горивата. Според пресметките на Владата, бензините треба да поевтинат за два денари, а цената на дизелот да остане иста или да биде зголемена за половина денар.
Премиерот Христијан Мицкоски во саботата изјави дека наалувањето на ДДВ ги дава поскауваните ефекти и дека ако има потреба ќе биде продолжена мерката или ќе се воведе нова мерка со акцизата.
Според Мицкоски, состојбата во земјава е стабилна и нема потреба од никакви ограничувања.
– Сега засега состојбата е стабилна и нема потреба од рестрикции. Намалувањето на ДДВ ја намали цената на горивата, рече Мицкоски.
Премиерот тврди дека имаме најевтини горива од земјите во регионот и дека затоа има зголемена побарувачка на гориво во пограничните места.
РКЕ минатиот понеделник ги определи малопродажните цени на горивата. Цената на ЕУРОСУПЕР БС – 95, според одлуката на РКЕ, изнесува 86,50 денари/литар, а на ЕУРОСУПЕР БС – 98 цената е 88,50 денари/литар. Малопродажната цена на дизелот е 95,50 денари/литар, а на Екстра лесно масло за 92 денари/литар.
