Со етно-џез концерт на „Чалгија Саунд Систем“, во предворјето на црквата „Света Софија“ започна третото издание на „Охрид Џез Фестивал“, кој се организира под покровителство на Општина Охрид.
На свеченото отворање пред присутните се обрати претседателот на Советот на Општина Охрид, Перчо Божиновски, кој истакна дека „вечерва Охрид дише поинаку – со срцето на музиката, со душата на џезот и со трепетот на очекувањето“. Тој потсети дека џезот не е само звук, туку емоција и слобода, музика на душата и универзален јазик што ги обединува луѓето.
Фестивалот, кој ќе трае од 22 до 24 август, нуди настапи на врвни уметници кои не само што свират, туку и живеат преку музиката. „Нека оваа музика зборува таму каде што зборовите молчат и нека ги обедини Охрид и Македонија во една заедничка симфонија на духот“, порача Божиновски прогласувајќи го фестивалот за отворен.
Втората вечер донесе вистинско музичко патување со џез евергрини, кои на публиката ѝ ги подари врвниот македонски баритон Павле Камилоски. Настапот во „Св. Софија“ потврди дека фестивалот се издигнува на повисоко ниво и дека Охрид полека, но сигурно, го добива приматот – центар на џез музиката во месец август.
