Цената на златото денеска падна на 5.023 долари за унца, продолжувајќи го негативниот тренд по две последователни недели на намалување. Пазарите се под притисок поради растот на цените на нафтата и ескалацијата на конфликтот на Блискиот Исток.
Дополнителна неизвесност предизвика нападот на САД врз иранскиот нафтен терминал на островот Харг, кој претставува еден од клучните извозни центри на Иран. По нападот, Техеран возврати со напади врз Израел и енергетска инфраструктура во неколку арапски земји, што дополнително ги зголеми стравувањата за стабилноста на глобалните енергетски залихи.
Воениот конфликт меѓу САД, Израел и Иран влезе во третата недела без јасни знаци за смирување. Поради тоа, неизвесноста на светските финансиски пазари останува висока.
Растечките цени на енергијата дополнително ги зголемуваат ризиците од инфлација, што ја намалува веројатноста за брзо олабавување на монетарната политика.
Во вакви услови, златото се соочува со притисок, бидејќи повисоките каматни стапки ја намалуваат привлечноста на инвестициите во средства кои не носат каматен принос.
Во меѓувреме, се очекува Федералните резерви на САД оваа недела да ја задржат каматната стапка непроменета. Одлуки за монетарната политика се очекуваат и од повеќе други централни банки, меѓу кои и оние во еврозоната, Обединетото Кралство, Јапонија, Швајцарија, Австралија, Канада, Кина, Бразил и Русија.
