Нови вознемирувачки детали поврзани со бруталниот напад врз младата Сара во Охрид објави нејзината мајка, која преку социјалните мрежи јавно се обрати до институциите и јавноста.
Мајката тврди дека Сара сè уште се наоѓа во болница, а дополнителен страв кај семејството предизвикала информацијата дека лицето кое, според неа, е одговорно за нападот својата слобода ја поминало синоќа.
„Како мајка и родител, чувствувам потреба јавно да се обратам во името на мојата ќерка Сара, која сè уште се наоѓа во болница. Таа, наместо да се грижи за своето здравје и закрепнување, живее во страв и неизвесност за сопствената безбедност“, наведува мајката.
Во својата објава таа изнесува сериозни тврдења за околностите на нападот и за однесувањето на лица од опкружувањето на осомничениот.
Според нејзиното сведоштво, во моментот кога Сара била во бессознание, осомничениот наводно стапил во контакт со својот татко, мислејќи дека девојката е мртва, при што, како што тврди мајката, било разговарано за начин како да се ослободи од нејзиното тело.
Мајката наведува и дека телефонот на Сара бил намерно искршен, со што, според неа, ѝ била оневозможена можноста да повика помош.
Особено тешко тврдење во објавата е дека Сара наводно слушнала разговор во кој се зборувало за нејзино отстранување и фрлање во провалија.
Мајката изнесува и тврдење дека едно лице од семејството на осомничениот контактирало со болницата во која се наоѓа Сара, со цел, како што наведува, да се влијае врз медицинскиот извештај и да се ублажи сериозноста на повредите.
Таа исто така тврди дека лица од неговото опкружување одбивале да ја однесат Сара во болница, иако таа барала помош.
Во најтешкиот дел од сведоштвото, мајката наведува дека осомничениот наводно побарал нож и сакал да ја „докрајчи“.
Според нејзината верзија на настаните, Сара дошла при свест пред да биде однесена од местото, по што, како што тврди мајката, била фрлена на улица.
Мајката во објавата поставува и сериозни прашања за тоа како се постапува во случајот и дали влијание врз постапката можат да имаат политички или други врски.
Таа притоа наведува имиња и функции на родители на осомничениот и изнесува тврдења за нивни наводни политички и институционални врски.
Овие наводи ги пренесуваме како тврдења и сведоштво на мајката, а не како правосилно утврдени факти. За нивната точност и за сите околности на случајот надлежни се истражните и судските органи.
Сепак, едно прашање останува во центарот на вниманието:
Како е можно лице осомничено за ваков тежок напад да биде пуштено на слобода додека жртвата сè уште се наоѓа во болница?
Јавноста очекува одговор од надлежните институции – што точно се случило, по кој основ е пуштен осомничениот и дали се преземени мерки за заштита на Сара?
Редакцијата ќе продолжи да го следи случајот и ќе ги објави и одговорите на надлежните институции.
