Православните верници утре го одбележуваат денот посветен на Свети Еразмо Охридски, еден од најпочитуваните светители во Охрид и Македонија. Според црковниот календар, празникот се слави на 15 јуни, а уште од вечерва започнуваат богослужби и молитви во манастирскиот комплекс посветен на светецот.
Свети Еразмо бил архијереј и проповедник на христијанството, а според преданијата поседувал дарба за чудотворство. Неговото име особено се поврзува со Охрид, каде што и денес постои силен култ кон него.
Традиционално, во пресрет на празникот и на самиот ден, голем број верници го посетуваат манастирот и пештерската црква „Св. Еразмо“, палат свеќи и се молат за здравје, среќа и благосостојба на своите семејства.
Во народот постои верување дека молитвата упатена кон Свети Еразмо носи утеха, надеж и духовна сила, поради што неговиот празник секоја година собира верници од целата земја и од странство.
