Ракометарите на ГРК Охрид ја продолжуваат успешната серија во домашното првенство, откако синоќа на гостувањето кај Куманово славеа со 28:24, во натпревар од деветтото коло на македонската Суперлига.
Избраниците на Борис Ројевиќ уште од почетокот ја презедоа контролата врз натпреварот. Иако домашниот состав поведе со 2:1, охриѓани брзо направија пресврт и постепено ја зголемуваа предноста. На полувремето заминаа со сигурни пет голови разлика (11:16).
Во вториот дел „гладијаторите“ продолжија со добра игра, а во еден момент имаа и највисоки осум голови предност (12:20). Куманово во финишот успеа да ја намали разликата, но не и да го загрози триумфот на гостите.
Најефикасни во редовите на Охрид беа Адама Кеита и Мартин Карапалевски со по четири постигнати голови.
Со оваа победа ГРК Охрид стигна до седмиот триумф сезонава, а по девет одиграни натпревари има учинок од седум победи, едно реми и еден пораз, со вкупно 15 бодови. Охриѓани моментално се на четвртото место на табелата во Суперлигата.
