Премиерот Христијан Мицкоски денеска упати остра порака до лидерот на СДСМ, Венко Филипче, како и до Љубомир Фрчковски и Андреј Жерновски. Тој им даде „отворена понуда“ – до пролет да прошетаат низ Македонија и да најдат барем еден мигрант кој би бил дел од наводниот договор со Велика Британија за прифаќање азиланти.
„Ако успеат да најдат еден таков човек, јас трајно ја напуштам политиката. Ако не, минимум што можат е да излезат и да се извинат за создавањето непотребна паника“, рече Мицкоски, нагласувајќи дека оваа понуда останува валидна додека тој е премиер.
Мицкоски оцени дека СДСМ, како што рече, „останале без тема“ и сега наводно го туркале наративот за мигрантите само за политички да преживеат. Потсети и дека британски таблоиди често објавуваат непроверени информации, а како пример го спомена случајот кога главниот уредник на BBC поднел оставка поради неточни вести.
Во врска со финансиските обвинувања на СДСМ, дека во буџетот „фали една милијарда евра“ и дека договорот со Велика Британија наводно служел за покривање таа дупка, премиерот категорично демантираше.
„Приходите веќе ја надминаа проектираната рамка – само за првите пет дена од декември инкасирани се 10 милијарди денари. Расходите се под контрола, штедевме и нема да се задолжуваме дополнително. Напротив – долгот ќе биде помал од лани“, појасни Мицкоски.
Тој најави и дека очекува Обвинителството, со назначувањето на нов обвинител, конечно да работи послободно и поефикасно.
„И медиумите ќе имаат работа – ќе се отвораат прашања каде завршиле милијардите што се украдени претходните години“, додаде премиерот.
На крај, Мицкоски порача дека државата е стабилна, економските параметри се позитивни – вработеноста расте, инфлацијата се намалува – и ги повика граѓаните да бидат мирни пред претстојните празници.
„Нема мигранти, буџетот е здрав, Македонија е на вистинскиот пат. За разлика од минатото, оваа Влада има план и знае каде ја води државата“, заклучи тој за време на увидот во изградбата на мултифункционалниот центар во Аеродром.
