Низа протести и собири ќе се одржат денеска во Атина, но и во останатите грчки градови во рамките на 24-часовен штрајк што го закажаа грчките синдикати поради железничката несреќа со 57 жртви.
Штрајкот го закажа синдикатот на вработените во државниот сектор (АДЕДИ), соопштувајќи дека неколкучасовниот прекин во работата за одбележување на Меѓународниот ден на жената, го претвораат во штрајк за, како што велат, сите заедно да побараат „да се стави крај на политиката на приватизацијата и да се придаде вистинска одговорност за смртоносниот криминал кај Темпи“.
Грција денеска е без бродски и железнички сообраќај, во прекин е и јавниот превоз во Атина, со исклучок на метрото и трамвајот што работат неколку часа за да им се олеснат на граѓаните да учествуваат во протестот.
Во штрајкот учествуваат и синдикатите на вработените во државните болници, и во училиштата, како и студентски здруженија.
Железничката несреќа што пред една седмица се случи кај месноста Темпи во близина на градот Лариса, а во која загинаа 57 лица, предизвика бурни реакции кај Грците, а протести се одржуваа и во изминатите денови.
