Во недела губиме еден час сон: почнува летното сметање на времето: Совети од експерти за брзо приспособување на биоритамот

Ноќта меѓу сабота и недела, на 29 март, точно во 2 часот по полноќ, стрелките на часовникот ќе се поместат еден час напред – на 3 часот. Со тоа, практично „исчезнува“ еден час од нашиот викенд.

-50%

За Твојата Реклама на овој рекламен банер

Клини за Контакт

Правилото е едноставно: напролет стрелките одат напред, а наесен назад. Ова значи дека влегуваме во период со подолги денови и повеќе дневна светлина, иако краткорочно губиме еден час сон. Добрата вест е што повеќето современи уреди, како мобилни телефони и паметни часовници, автоматски ќе се прилагодат на новото време.

 Зошто промената ни паѓа тешко?

Иако станува збор за само еден час, телото често реагира како да е многу повеќе. Причината е во циркадијалниот ритам – внатрешниот биолошки часовник кој го регулира спиењето, будноста и бројни други процеси во организмот.

Со ненадејната промена, телото излегува од својот природен ритам, па многумина веќе во понеделник се чувствуваат поуморни, поспани и со намалена концентрација.

 Зошто воопшто се поместува времето?

Идејата за летно сметање на времето потекнува од времето на Првата светска војна, кога некои земји, предводени од Германија, го вовеле овој систем со цел да заштедат енергија и да ја намалат потрошувачката на ресурси.

Денес, мислењата се поделени. Дел од експертите сметаат дека придобивките се минимални, додека негативните ефекти врз сонот и секојдневните навики се сѐ поизразени.

Како полесно да се прилагодите?

Експертите советуваат неколку едноставни чекори:

• Почнете да легнувате 15–20 минути порано уште од четврток или петок

• Изложете се на природна светлина веднаш по будењето

• Започнете го денот со вода (по можност млака со лимон), па дури потоа кафе

• Избегнувајте напорни обврски во недела и оставете простор за одмор

Има и добра страна

И покрај почетниот замор, летното сметање на времето носи и позитивни промени. Деновите стануваат подолги, сонцето заоѓа подоцна, а тоа значи повеќе време за прошетки, дружење и активности на отворено.

Со други зборови – иако губиме еден час сон, добиваме повеќе светлина и енергија во секојдневието, што за многумина е знак дека пролетта навистина пристигнала.