Поради отворањето на контроверзното здружение именувано по фашистичкиот државник, слуга на Хитлер и борец против македонизмот „Цар Борис III“, Левица – Охрид ја повикува целокупната здраворазмуна јавност на протест против уривање на уставниот и државен поредок на Република Македонија и против разгорувањето на национална омраза, велат во соопштението од ЛО Левица Охрид.
Најстрого го осудуваме отворањето на овој клуб во Република Македонија и премолчувањето од страна на Владата која директно ја подржува рехабилитацијата на фашизмот. Сплотени против империјализмот и антимакедонизмот, да го искажеме народниот револт. Да го зачуваме достоинството на македонската нација и споменот на македонските антифашистички борци и да не дозволиме рушење на интегритетот на државата!, велат во соопштението.
Протестот е закажан на 7-ми октомври со почеток од 11 и 30 часот на улица „Македонски Просветители“, пред ТЦ Амам – Охрид.
Инаку, отворање на новиот бугарски културен центар што го носи името на Цар Борис III е најавено на 7 октомври во Охрид. Специјален гостин на отворањето ќе биде бизнисменот и филантроп д-р Милан Врабевски, со чија финансиска помош е отворен клубот, стои во објавата на фејбук профилот на Здружението.
