Вработен во Дирекцијата за заштита и спасување (ДЗС) попладнево е приведен поради сомнение за примање поткуп, информираат од Министерството за внатрешни работи.
Акцијата ја спровеле припадници на Одделот за сузбивање организиран и сериозен криминал при МВР, во координација со Основното јавно обвинителство Скопје.
Од Јавното обвинителство информираат дека во тек се активности за обезбедување докази, а лицето, по насоки на јавен обвинител, е задржано во полициска станица. Одлука на јавен обвинител се очекува утре.
Според информациите што ги објави директорот на Дирекцијата за заштита и спасување, Стојанче Ангелов, пред неколку дена добил пријава од граѓанин кој се пожалил дека вработен во институцијата му побарал 500 евра за да му издаде позитивно мислење потребно за изградба на објект.
Ангелов посочил дека граѓанинот му се обратил со поплака, по што бил упатен случајот веднаш да го пријави во Одделот за организиран криминал при Министерството за внатрешни работи.
Според објавените информации, приведениот бил вработен во ДЗС на работната позиција советник за урбанистичко планирање.
Од МВР најавуваат дека по целосно документирање на случајот ќе биде поднесена соодветна кривична пријава.
Истрагата треба да ги утврди сите околности околу случајот, а надлежното обвинителство ќе одлучува за понатамошниот тек на постапката.
