Водостојот на Охридското Езеро минимално подобрен, но и понатаму е далеку од августовскиот просек.
Според денешните мерења на Управата за хидрометеоролошки работи на Република Македонија (УХМР), водата е на кота од 693,35 м.н.в, што е за десет сантиметри под просекот за август (693,45 м.н.в), односно 25 сантиметри над дозволениот минимум (693,10 м.н.в). Температурата на езерската вода е 22,5 степени, за еден пониска од просекот
Врнежите од дожд во мала мера позитивно се одразија на хидролошката состојба, па за една недела нивото е покачено за два сантиметри.
Во Охрид денес претпладне сончево време со мала до умерена облачност. Попладне е можен локален дожд и грмежи. UV индексот ќе биде 5, а максималната температура ќе се искачи до 26. степени.
– До среда времето на повеќе места ќе биде нестабилно со пороен дожд и грмежи, а во четврток и петок ќе има изолирана појава на нестабилност. Локално процесите ќе бидат поинтензивни во форма на невреме со пообилен дожд, силен ветер, електрични празнења и појава на град, информираат од УХМР.
