Доделени дипломите на матурантите од Средното економско училиште „Св. Кирил и Методиј“ во Охрид. На пригодна свеченост синоќа на Долни Сарај свое обраќање пред присутните имаше и градоначалникот на Општина Охрид, Кирил Пецаков, кој истакна дека огромно е задоволството и прекрасно е чувството да се присуствува на оваа свеченост на доделување дипломи со која, како што рече, сите ние присутни сме сведоци на крајот на една животна епизода на оваа младина и почеток на друга.
Веќе утре вие ќе бидете на животната раскрсница од каде јасно ќе гледате неколку правци, дали сакате да го продолжите своето образование или ќе се насочите на изучување на некој занает. Одлуката е ваша и секако ќе биде добра во двата случаи само доколку не скршнувате од патот кој сте го зацртале. На својот иден пат кон успехот не заборавајте ги досегашните ваши професори. Заблагодарете им се за сето знаење што ви го предале. Да ја искористиме оваа прилика да им ја зајакнеме вербата во благородната професија која ја работат, а е една од најубавите во светот, рече Пецаков.
Запаметете нешто, неуспехот не постои. Неуспехот е начин на кој вашиот живот се обидува да ве убеди да го промените правецот. Пратете ги своите соништа, останете верни на себе. Никогаш не следете никого освен ако не сте се изгубиле. Дури и ако сте изгубени, а го гледате патот пред себе мора да зачекорите по него користејќи ги сите средства што ви се на располагање. Бидете искрени кон себе и се ќе биде во ред. Се што ќе правите во иднина правете го од срце, со љубов. Учете посветено, работете вредно, вложувајте се себеси во својата професија, сакајте го и бидете со своето семејство и тогаш повеќе од сигурно вие ќе бидете целосно изградена и успешна личност, додаде Пецаков.
До зачекорување во новиот свет на возрасните ве оставам во добро расположение. Бидете здрави, среќни, позитивни и секогаш насмеани- им порача градоначалникот Пецаков на матурантите.
