Американскиот претседател Џо Бајден рече дека само „Семоќниот Бог“ може да го убеди да ја прекине својата кандидатура за реизбор, за време на интервјуто во ударниот термин во обид да ја смири загриженоста на демократите за неговата кандидатура.
Зборувајќи за ABC News, Бајден, исто така, одби да направи когнитивен тест и да ги објави резултатите за да ги убеди гласачите дека е способен да отслужи уште еден мандат.
„Имам когнитивен тест секој ден. Го имам тој тест секој ден – сè што правам (е тест)“, рече Бајден.
Тој уште еднаш ја отфрли идејата, предложена од некои демократски функционери и донатори, да се откаже во корист на помлад кандидат по неговата катастрофална дебата со Доналд Трамп минатата недела.
„Мислам дека никој не е поквалификуван да биде претседател или да победи во оваа трка од мене“, рече Бајден, обвинувајќи ја исцрпеноста и „лошата настинка“ за неговите лоши резултати минатата недела.
Бајден одговараше на прашања појасно отколку на дебатната сцена минатата недела, но неговиот глас повторно звучеше слабо и повремено засипнат.
