Пожарникарите од ТППЕ Охрид заедно со ЈП „Комуналец – Охрид“, од утрово интервенираат поради запалени отпадоци на депонијата „Буково“, велат од ЦУК.
Имено, вчера до редакцијата на powerinfo.mk од граѓани пристигнаа неколку реакции за состојбата на Буково.
Депонијата кај Буково повторно гори, пламен и непријатна миризба се шири кај Буково, сликата од магистралниот пат Охрид-Ресен е ужасна.
Состојбата на Буково редакцијата на powerinfo.mk бурно ја следи уште пред неколку месеци, а постојано реагираат и мештаните од соседните села што сред планина се приморани да дишат загаден воздух и смрдеа.
Инаку, минатиот месец апел имаше и Центарот за јавно здравје – Охрид, каде апелираа до граѓаните на Охрид, гостите, туристите, додека не се реши проблемот со горењето на комуналниот смет на депонијата во Буково, во вечерните и утринските часови да не ги отвораат прозорците и доколку почувствуваат мирис на чад, да останат во своите домови.
Поради опасноста што може да ја предизвика опасниот чад предизвикан од неконтролирањето спалување/горење на комуналниот отпад, врз здравјето на луѓето, Центар за јавно здравје апелира до надлежните институции веднаш да преземат соодветни мерки и активности за решавање на проблемот. Особено предупредуваме луѓето кои непосредно ќе учествуваат во справувањето со комуналниот смет на депонијата која гори, да користат соодветни заштитни средства (маски, очила и сл.) – потенцираат од центарот за јавно здравје.
