Трошоците за живот продолжуваат да растат, а според последните пресметки на Сојузот на синдикати на Македонија, на едно четиричлено семејство му се потребни речиси 70.000 денари месечно за да ги покрие основните потреби.
Најголем дел од буџетот оди за храна и пијалаци, но значителен товар претставуваат и сметките за струја, вода, транспорт и домување. Во меѓувреме, инфлацијата и натаму влијае врз куповната моќ на граѓаните, а голем дел од домаќинствата признаваат дека се принудени да штедат и да се откажуваат од одредени трошоци.
Економистите предупредуваат дека, и покрај растот на платите, поскапувањата во изминатите години значително го намалија животниот стандард. Дополнителен притисок создаваат и цените на храната, кои и понатаму остануваат меѓу главните причини за растот на трошоците.
Според податоците на Државниот завод за статистика, годишната инфлација во мај достигна 4,8 проценти, додека синдикалната минимална кошничка повторно се приближува до границата од 70.000 денари.
