Во пресрет на летната туристичка сезона, македонски полициски службеници ќе бидат дел од заедничките патроли на албанското крајбрежје, во рамки на регионална безбедносна операција во која учествуваат и полицајци од Косово, Црна Гора и Италија. Целта е зголемување на безбедноста на туристите и превенција од инциденти во најпосетените туристички зони.
Според најавите на албанската државна полиција, заедничките патроли ќе бидат распоредени долж крајбрежјето, но и на најфреквентните патни правци кои водат кон туристичките центри. Директорот на Одделот за јавен ред и безбедност при албанската полиција, Димитраќ Зиу, соопштил дека соработка е договорена со Македонија, Косово, Црна Гора и Италија, а за таа цел ќе бидат потпишани сезонски договори за соработка.
Албанија ова лето ќе ангажира најмалку 1.600 полициски службеници од различни структури – специјални единици, сообраќајна полиција, оперативни сили и национални безбедносни служби. Дополнително, на патиштата ќе бидат поставени радари и современи системи за следење на сообраќајот со цел да се намали бројот на прекршоци и сообраќајни несреќи.
Во одделни туристички и планински региони ќе бидат отворени и привремени полициски пунктови, како дел од поширокиот план за управување со зголемениот број посетители во текот на летото.
Ова не е првпат македонски полицајци да учествуваат во вакви меѓународни патроли. Практиката на заеднички полициски тимови во туристичките центри на Балканот се покажува како ефикасен механизам за комуникација со странските туристи, побрзо решавање на инциденти и јакнење на регионалната соработка меѓу безбедносните служби.
За Македонија, која секоја година има илјадници граѓани што летуваат на албанското приморје, присуството на македонски полициски службеници може да придонесе за поголемо чувство на сигурност кај туристите, но и за поефикасна координација во случај на потреба од конзуларна или полициска помош.
